ت متحررة - ت متحررة هي حملة سوريّة تسعى لتغيير الأنماط السلبية الجاهزة والسائدة عن السوريات٫ تنشر تجاربهن وحكاياتهن ونضالاتهن٫ وتفضح الانتهاكات القائمة على النوع الاجتماعي التي تمارس ضدّهن من أي طرف.

  زحت شيماء مع عائلتها من الرقة خلال فترة حكم داعش لتستقر وتبدا حياة جديدة بعامودا، وقررت تشتغل لتعيل نفسها وأهلها، ولما لقت فرصة للعمل بمحل لبيع الحلويات، أخدتها واشتغلت رغم عدم تقبل المجتمع لفكرة عمل النساء بهالمجال، وشجعت نساء أخريات على العمل أيضاً. #ت_متحررة  

فاطمة متطوعة بالدفاع المدني، طلع زوجها من المعتقل وعندو عدة أمراض منعته من إنو يرجع لحياته الطبيعية، عندها ٣ أطفال، وهي خريجة معهد تمريض ونازحة من حلب على ريف إدلب. وبرغم انتقادات المجتمع لقيادتها السيارة وعملها خارج البيت، واعتراض حتى عيلتها لشغلها واستقلاليتها، إلا إنها مستمرة بمساعدة مو بس عيلتها وإنما المحتاجين اللي بتقدملهم الخدمات […]

من ربة منزل اتحولت رنا لممرضة ثم لإعلامية بعد ما حضرت تدريب صحفي، لتحقق أخيرا حلم طفولتها وتشتغل بهي المهنة. رنا أم وحيدة مسؤولة عن سبع أطفال عايشة معهم بمخيم بادلب، بعد ما انجبرت تنزح من ضيعتها نتجة القصف المستمر، بتشتغل مع عدة شبكات مواد مكتوبة ومصورة وبتركز على القصص الإنسانية وتحديدا قصص النساء. #ت_متحررة […]

بتشتغل أم محمد من سنين بتشكيل لوحات الفسيفساء وبتعيّش عيلتها من بيع القطع اللي بتنتجها، اتعلمت المهنة من زوجها “الشغل هاد مو للرجال بس، كل نسوان ضيعتنا بيشتغلوا عادي” بتقول أم محمد.

اتهجرّت ازدهار من حلب وانتقلت لإدلب لتشتغل كمسؤولة عن رعاية الأيتام وتقديم الدعم النفسي والاجتماعي الهم بمنظمة محلية، قبل ما تأسس مركز خاص لرعاية الأطفال وتعويضهم عن الرعب اللي عايشينه نتيجة ظروف القصف اللي عمتتعرضله المنطقة.

رنيم هي أول امرأة بتفتح محل لصيانة الألكترونيات بالرقة، ورغم دهشة العديد من زوار محلها بإنو تصلحلهم امرأة موبايلاتهم، إلا أنها مكملة بشغلها وعم تحاول إنها تدفع المجتمع لتقبل عمل النساء بكل المجالات. ليش برأيكم “غريب” إنو الصبية تكون مصلحة الكترونيات؟  

في دوائر اجتماعية ضيّقة، تتناقل النساء قصصاً عن التحرش الجنسي، اختبرنها بأنفسهن أو سمعن عنها. فيها، يُسمّى المتحرشون وتوصَف أفعالهم. هي خيار الضحايا الأقل خطراً للبوح، في مجتمع ما زال يلوم المتحدثات ويصمهنّ، بسبب ما تعرّضن له من اعتداءات. فالبوح يبقى واحدة من آليات المواجهة القليلة الباقية للنساء، إنْ لم يكن لتحقيق العدالة، فعلى الأقل […]

هدى سورية تعرّضت للاعتقال من قبل قوات النظام، وزوجها مازال مختفي بسجونه للآن. لما طلعت هدى من السجن قررت إنها تشتغل لمساندة الناجيات الأخريات وتحدي الوصمة الاجتماعية اللي بتتعرضلها بمجتمعاتنا الذكورية. #ت_متحررة

بتشتغل هديل بتوثيق الانتهاكات اللي اتعرضلها المعتقلين والمعتقلات بسجون النظام السوري، ومحاولة إيصال معلومات للأهالي عن بناتهم وولادهم المعتقلين وهدفها هو #لنحقق_العدالة ورغم شغلها الإنساني هي مضطرة لأنها امرأة انو يكون معها رجل لتقدر تتحرك. #ت_متحررة

اعتقلت سندس من قبل النظام السوري ١١ شهر ولما طلعت انجبرت تواجه الوصمة الاجتماعية الها، بتقول بهالفيديو “بيطلع الرجل من المعتقل بطل، بس المرأة يا حرام اعتقلوها”. وبرغم هيك وقفت سندس على رجليها وعمتشتغل لتمكّن الناجيات من الاعتقال بالشمال السوري. #لنحقق_العدالة

الحب والامتنان الي بتحكي فيهم نجاح عن زوجها طاغي على كلشي بتقوله. “هو أطلقني” بتقول عن عمر اللي معتقل بسوريا بتهمة مساعدة النازحين من ٨ سنين، وتاركها وولادهم الأربعة. بعد نزوحها ضغطوا عليها أهلها لتعيش معهم لأنها “مرا لحالها”، لكنها استقلّت وعاشت مع ولادها، وبرغم إصابتها بالسرطان إلا إنها مكملة بشغلها، ومعيشة ولادها بجو إنو […]

نسرين مدرّسة سورية، اعتقل زوجها من حوالي ٧ سنين ومن وقتها ماعندها أي خبر عنو، ورغم هيك بتحاول تخليه حاضر بذاكرة ولادهم اللي كبروا وهنن مفكرين جدهم هو أبوهم. “لو كان ميت بقدر بقلهم مارح يرجع، بس هلأ مابعرف شو جاوب لما يسألوني” بتقول نسرين بهالفيديو. وبرغم كل اللي عم تتحمله، فوقها بيجي ضغط المجتمع […]